№11 кітапхана филиалында ашық аспан астында «Қазақтың спорттық ойындары – ұлттық құндылықтар» атты тақырыптық көрме ұйымдастырылды. Мақсаты: оқырмандарға адам өмірінде спорттың алатын орны, спорттың шығу тарихы, қазақтың ұлттық спорттық ойын түрлері туралы мағлұмат беру, ұлттық құндылықтарды дәріптеу. Шара барысында кітапханашы адам өмірінде спорттың алатын орнының ерекшелігіне тоқтала келе, спорттың шығу тарихын, қазақтың ұлттық спорт ойындары, олардың түрлері мен тәрбиелік маңызы, елбасымыз Нұрсұлтан Назарбаевтың «Қазақстан - 2030» стратегиялық даму бағдарламасындағы халқына жолдауында «Қазақстанның әрбір азаматының денсаулығы мықты, хал – ахаулы жақсы болуы тиіс» деп атап көрсеткені жайында баяндап, аталмыш тақырыптағы баспа өнімдеріне библиографиялық шолу жасады.
№ 1 балаларға қызмет көрсету кітапхана-филиалында «Сиқырлы киіз» атты ойын викторинасы өтті. Мақсаты: қазақ халық ертегілері мен мақал-мәтелдерінен алған білімдерін толықтырып, бекіту, халықтың ауыздан-ауызға тараған, үлкен тәрбиелік мәні бар мұрасын бойына сіңіру, оқырмандарды осы ертегілер арқылы жақсылыққа тәрбиелеу. Оқырмандар кітапханашымен бірге сыйқырлы ертегілер әлеміне аттанды. Шараның барысында оқырмандар жұмбақтар шешіп жарысты. Қазақ мақал-мәтелдерін айтып, мағынасына терең ұғынды. Соңында «итеріспек» ойынын ойнап, жақсы көңіл-күймен тарқасты.
№12 балаларға қызмет көрсететін кітапхана бөлімшесінде «Құлпырған жаз, түрленген жанр» жаңа кітаптарға шолу жасалды. Мақсаты: кітаптарды насихаттау, кітапхананы жарнамалау, оқуға тарту, жаңа кітаптармен таныстыру. Кітапхана ауласында «Құлпырған жаз, түрленген жанр» атты кітапханаға жаңадан түскен кітаптарға арналған көрме қойылды. Оқырмандар қазақстандық «Аруна», «Фолиант» баспаларынан шыққан балалар әдебиетімен таныстырылды. Көпшіліктің назары - әсіресе, «My shape book» сериясына және қарағандылық жазушы Дәрия Жұмагелдинованың «Тату отбасы», «Кішкентай жігіттің күнделігі», А.Беркімбаеваның «Дәуіт ата ертегілері» кітаптарына түсті. Шолу соңында көпшілік оқырмандар кітаптарды өз қолдарына алып парақтап көріп, жақынырақ танысты.
№29 кітапхана-филиалында жазушы, аудармашы Іслам Жарылғаповтың туғанына 100 жылдығына орай «Сарыарқа жазушысы» атты әдеби сағат ұйымдастырылды. Мақсаты: І.Жарылғаповтың жазушылық, аудармашылық қырымен таныстыру. Шара барысында жазушының өмірі мен шығармашылығына тоқталып, көптеген орыс классиктерінің, батыс-еуропа және кеңес жазушыларының туындыларын қазақ тіліне аударғандығы туралы айтып өтті. Іслам Жарылғаповқа «1941-1945 жылдардағы Ұлы Отан соғысындағы ерен еңбегі үшін» медалі берілгендігі туралы да тоқталып өтті. Шараға қатысушылар үшін кітаптар мен мерзімдік басылымдардан «Сарыарқа жазушысы» атты библиографиялық көрме ұйымдастырылды.
1 тамыз күні М.Әуезов атындағы Орталық қалалық кітапхананың балалар бөлімі «Еркетайым» балабақшасының «Жұлдыз» тобының балалары үшін «Спорт –біздің досымыз» тақырыбында әдеби-спорттық ойын өткізді. Шараның мақсаты: балалардың спортқа деген қызығушылықтарын ояту және салауатты өмір салтын ұстануға тәрбиелеу. Кітап оқуға, ертегілер әлеміне баулу. Шара барысында балалар бөлімінің кітапханашысы Көшербаева Айзада балаларға денсаулық және спорт туралы, денсаулыққа зиянды әдеттер және салауатты өмір салты жайлы түсінік берді. Күнделікті күн тәртібін құруды және дұрыс тамақтанудың, денешынықтырумен айналысудың пайдасы туралы әңгімеленді. Әдеби-спорттық ойынға қатысушы балаларды «Денсаулық» және «Шымыр» тобына бөліп, денсаулық туралы мақал-мәтел айтып, жұмбақтар шешуден жарыс ұйымдастырылды. «Кім білгір», «кім тапқыр», «доп қуу», «би» сайыстарында балалар өте белсенділік танытты. Тік төртбұрыштарда бейнеленген денсаулыққа пайдалы және зиянды заттарды тауып көрсете білді. Кітапханашы балаларға ертегілер оқып, кітап көрмесіне шолу жасады, балалар түрлі-түсті және сөйлейтін кітаптарға деген қызығушылықтарын көрсетті.
