2024 жылдың 23 ақпан күні «Қарағанды қаласының мәдениет, тілдерді дамыту, дене тәрбиесі және спорт бөлімі» ММ-нің қолдауымен «Қарағанды қаласының орталықтандырылған кітапхана жүйесі» КММ-де «Қарағанды қаласының 90 жылдығына арналған 90 кездесу» жобасы аясында ҚР білім беру жүйесінің құрметті қызметкері, заң ғылымдарының докторы, профессор, Ұлттық ғылым академиясының корреспондент-мүшесі, «Карлаг – болашақ үшін естелік» жобасының авторы мен жетекшісі, Академик Е.А.Бөкетов атындағы Қарағанды Университетінің ректоры Нұрлан Орынбасарұлы Дулатбековпен «Ғалым. Қайраткер. Тұлға» атты кездесу өтті. Кездесуге Ә.Сағынов атындағы «Қарағанды техникалық университеті», «Bolashaq» Академиясы, Инновациялық технологиялар колледжінің студенттері мен ғалым-оқытушылары және Н.Нұрмақов атындағы мамандандырылған мектеп-интернатының жоғары сынып оқушылары мен мұғалімдері қатысты. Кеш қонағы өзінің ғылымдағы жолы, қоғамдық қызметі мен зерттеулерімен бөлісті. Нұрлан Орынбасарұлы балалық шағындағы бақытты сәттерін еске түсірді, жастарды армандауға, көп талмай еңбектенуге және тарихты оқуға шақырды. «Тарих – қайталанып отыратын үрдіс, сол себепті біз әрқашан тарихтан сабақ алуымыз керек. Тарихымыздың жақсы жақтарын ғана емес, көлеңкелі жақтарын да зерделей білсек – үлкен мақсаттарға жететін жолды ашамыз, – деді ол. Оқырмандармен пікірлесу кезінде Нұрлан Орынбасарұлы ұлттық құндылықтарымыз және оны тану жөнінде келелі ойларын ортаға салды. Кездесудің құрметті қонағы мен оқырмандар арасында ашық, еркін сұхбат болды.
2024 жылдың 10 қаңтар күні М.О.Әуезов атындағы орталық қалалық кітапханада «Қазақ әдебиеті» газетіне 90 жыл толуы аясында журналист, өлке тарихын зерттеуші, «Мәдениет қайраткері» төсбелгісінің иегері, Қарағанды облысының Құрметті азаматы Төрехан Майбаспен «Маған ұнайтын басылым» атты кездесу кеші өткізілді. Кеш қонақтары: Қарағанды қаласы әкімінің орынбасары Ақылжанова Ляззат Төкенқызы; Қарағаныд қаласының ішкі саясат бөлімінің басшысы Ілияш Нұржан Ағыбайұлы; «Қарағанды қ. мәдениет, тілдерді дамыту, дене тәрбиесі және спорт бөлімі» ММ басшысы Нұртаева Баян Сейітбекқызы; жазушы, Қазақстан Жазушылар одағының мүшесі, Қазақстан Журналистер одағының мүшесі. ҚР Ақпарат саласының үздігі, Ғ.Мүсірепов атындағы сыйлықтың иегері, «Қазақ әдебиеті» газетінің жауапты хатшысы Дархан Бейсенбек; тележурналист, Қазақстанның Мәдениет қайраткері, ақпарат саласының үздігі, "Алтын Сұңқар" сыйлығының иегері Әли Тойжігіт; өлкетанушы, қуғын-сүргін құрбандарын есте қалдыру мақсатында құрылған "Тағзым" тобының мүшесі, ҚР Журналистер Одағының мүшесі, бірнеше кітаптардың авторы Смағұлов Аңғар Марғозыұлы, еріктілер ұйымының мүшелері, мектеп оқушылары және ұстаздар, кітапхана оқырмандары, Белсенді ұзақ өмір сүру орталығы.
2023 жылдың 25 қараша күні Қарағанды қаласының мәдениет, тілдерді дамыту, дене тәрбиесі және спорт бөлімінің қолдауымен М.О.Әуезов атындағы орталық қалалық кітапханада Теміржолшылар мәдениет сарайымен бірге Міржақып Дулатұлының туған күніне орай "Алаш айлығы" аясында «Азаттықты аңсаған ұлт көсемі» атты шара өткізілді. Шараға Кеңес Одағының батыры Т.Я.Бигелдинов атындағы Қарағанды «Жас ұлан» республикалық мектебінің оқушылары, кітапхана оқырмандары қатысты. Шара барысында «Міржақып. Оян, қазақ» сериалының үзінділері көрсетіліп, балаларға қызмет көрсету бойынша №1 филиал кітапханашысы Абильдина Азиза «Бақытсыз Жамал» романынан үзінді оқып, Қарағанды теміржол колледжінің 3 курс студенті Әлихан Медеуұлы «Оян, қазақ» өлеңін мәнерлеп оқыды, теміржолшылар мәдениет сарайының әншісі Дүйсенбин Шырақбектің орындауында «Қазақстаным», «Байтақ елім» әндері шырқалып, Казмитка Марат Қызметханұлы «Ақсақ құлан», «Салтанат» күйлерін тарту етті. Шара соңында «Азаттықтың жаршысы - Міржақып» кітап көрмесіне шолу жасалып, қатысушылар естелікке суретке түсті.
28 қарашада Мұхтар Омарханұлы Әуезов атындағы кітапханада талантты автор және сертификатталған кәсіби жаттықтырушы Марина Алясовамен шығармашылық кездесу өтті. Іс-шараға Е.А.Бөкетов атындағы №52 орта мектептің 8 сынып оқушылары, кітапхана оқырмандары және "Султик" клубының белсенді мүшелері қатысты.
Жақында Марина Алясова "Ашық Еуразия: Суперкубок" халықаралық Британдық байқауы аясында "Балаларға арналған Проза" номинациясы бойынша Мария Шевель сыйлығын алды. Енді оның "Балалар мен ересектерге арналған дана ертегілер" атты жаңа кітабы Лондонда басылып шығады.
Кездесу барысында балалар жазушымен танысып, оның шығармашылық жолы мен қызметі туралы көптеген қызықты фактілерді білді. Сондай-ақ, Мария Алясова балаларға өзінің жаңа кітабынан үзінді оқып, өзін-өзі дамыту бойынша кеңес берді.
Сондай-ақ, кездесуге "Ken'jol" инновациялық даму альянсының балалар, жастар, мәдениет және спорт мәселелері жөніндегі өкілі Дия Ержанова қатысты.
Қарағанды қаласы әкімшілігінің, «Қарағанды қаласының мәдениет, тілдерді дамыту, дене тәрбиесі және спорт бөлімі» ММ-нің қолдауымен М.О.Әуезов атындағы орталық қалалық кітапханасында ҚР Мәдениет қайраткері, Құрметті спорт қызметкері, «Ғажайыптар әлемі» кітабының авторы, Бауыржан Момышұлының «Батыр шапағаты» медалінінің иегері Шуланбаев Абылай Ілтайұлымен «Сарыарқа саңлағы» атты кездесу кеші өтті. Кездесу кешінің қонақтары: Қарағанды қаласы әкімінің орынбасары Л.Т.Ақылжанова, ҚР Парламенті Сенатының Қарағанды облысынан депутат Р.Қ.Әбдікеров, Халықаралық «Құрмет» ордені мен «Еңбек Қызыл ту» орденінің иегері, ҚР Еңбек сіңірген мұғалімі, Мәдениет қайраткері, Самбодан Қазақ КСР Еңбек сіңірген жаттықтырушысы, Жаңаарқа ауданының құрметті азаматы Д.Д.Биткөзов, «Парасат» ордені мен «Еңбек үздігі үшін» медалінің иегері, Қазақстанның Еңбек сіңірген қайраткері, Қарағанды облысы, Қарқаралы ауданының Құрметті азаматы Р.К.Омарбекова. Кездесу кеші Қали Байжанов атындағы концерттік бірлестігінің «Арқа сазы» фольклорлық ансамблінің сүйемелдеуімен өтті. Шара барысында кеш кейіпкері Абылай Ілтайұлын Қарағанды қаласы әкімінің орынбасары Л.Т.Ақылжанова «Еңбек даңқы» медалімен марапаттады. Арнайы шақырылған қонақтар, Абылай Ілтайұлының замандастары, әріптестері естеліктерімен бөлісіп, мерейтой иесіне ізгі тілектерін білдірді. Кездесу кеші естелік фотосуретке түсумен аяқталды.
